網頁列印

內容來自網址: https://www.worldjournal.com/6393966/article-link/

首頁 文藝

乖,你想要乜同阿媽講

聽到特首要約見大學生聆聽佢哋有乜訴求,直頭嚇咗一跳:「吓,佢無嘢呀嘛?」人哋啲訴求咪清清楚楚響咁多次遊行示威大大聲叫晒出嚟,仲有無數標語橫額雞乸咁大隻字寫響度,唔係話咁都聽唔見睇唔到嘛?

嗰啲訴求一樣都做唔到,仲需要啲乜嘢溝通,又想聆聽啲乜嘢呢?係咪嚇鬼死人先!如果一定要合理化政府呢個舉動,我哋必須睇埋嗰啲乜鬼都撑政府嘅人同時講緊乜鬼,就可以揣測。

我哋可以咁諗,有個仔覺得阿媽做事唔合理,到需要直斥其非嗰陣,阿媽就叫個仔嚟溝通聆聽:「查實你想買乜嘢,要幾多錢,阿媽俾你吖。」個仔當堂火起:「點解你唔信我真係覺得你做人做事有問題呢?」阿媽又慈母上身:「仔,你係咪覺得你開個數阿媽一定唔肯俾先,唔係㗎,多多都俾。」

唔單止阿媽咁諗喎,啲叔叔伯伯姨姨七嘴八舌出嚟講:「仲唔係學校個老師教壞佢?」「佢識咗個外籍朋友呀,啲外籍人士成日搞人屋企㗎!」「啲細路扭計呢,都不過係扭買嘢嘅啫!」

家長式管教最大問題,就係家長先諗好一套,搵你傾,你講完啦嘛,乖,阿媽俾粒糖你食吓,其他細路曳曳,佢地無糖食呀,以後你唔好同佢地玩嘞,知唔知?

在政府同親政府班人眼中,班後生仔邊度真係因為正義公義行出嚟吖,佢哋一個二個係因為買唔起樓,成世無得「上流」,咪反你囉!解決方法就係俾多啲着數佢哋,譬如幫多啲置業,批多啲錢俾佢哋創下業,佢哋條氣自然就順晒啦!

所以想同後生仔溝通,估計係想講你哋嗰五點或者七點訴求,一來政府無一樣做得到,反正認為你哋不過係借啲意搞事,真正想要嘅政府已經為你哋準備好,要錢有錢,要機會有機會。

或者政府係真心相信呢啲至係年輕人嘅真正訴求。



Copyright 2019 世界新聞網-北美華文新聞、華商資訊. All rights reserved.